АДЗЫ АНАДЗАРА АГЪЬЫРЧIВИТI

Уыхварали ЖКХ-ли КЧР аминистр ГОРДИЕНКО Евгений уыхварала РФ а-Министерства апны йакIвшаз «Экология» уагIахъа проект йаланакIуа «Дзыцкьа» федеральна проект рхъйара йазынхауа Россия а-КъральыгIва Совет агвып алачIвара далан. АлачIвара йалаз «Экология» уагIахъа проект рхъйара йазынарху адоклад йаларцIуш ажванахъаква йрыквчважватI. Ажванахъаква йрыуапI зымгIва йрапхъата акытква рпны адзцагаква ргIаршIыцхра йазалырхуа акъральыгIва ахчаква йрылархIара. ЙгIайуа ажвасквша рквтаква агородква рпны апшта акыт йтугьи дзыцкьа радзара атахъыпI. Датшагьи ажванахъаква йрыуапI Россия апны адгьылцIахь дзква раъаща рхъвыхра. ЙцIыхъвахауата ауи апш рхъвыхра йагIвсыз асквшышв аквтаква рагIан йакIвдыршатI. Агвып йалу ргвгIанаграла, «Дзыцкьа» федеральна проект дырхъйара ахъазла адгьылцIахь дзква руахьчIвачIви аъаща щаквыргылра атахъыпI. Къарча-Черкес апны асквш 2024 йадахIвуата знадзара хIагIу йуыжвуа дзы задзауа рпроцент 79,7-дза йнадырдзарныс йаквдырпшитI. ХIреспублика апны йдырхъйуш «Дзыцкьа» проект лырхтI йгьи йдрыбагъьатI.