АХЪАЦIАРА ЩТАДЪА ЙГЬЫДЗУАМ

Зеленчук йгьи Уарп районква райсра комиссариат йаунашвачпагIвыз, КЧР-ла гIатгара змаз акъральыгIва къвырльыкъвхара анхагIвы, аподполковник ХЪАКЪВПЩ Игорь КIара йпа асквш 1999 йгIашIарышвта дъанхуз Зеленчук станица йаныргIалу айсра комиссариат апны йчвахъабага гъвы гIахъыртIытI. Ауи йазынархаз айззара апны йгIачважватI КЧР а-Хъада йгьи а-Правительства р-Администрация аунашвачпагIв йапхъахауа йзаместитель СЕМЕНОВ Ахмат, КЧР айсра комиссар ТЕМЫР Арсен, Зеленчук район администрация ахъада йапхъахауа йзаместитель ЧОТЧАЕВ Анатолий, Уарп район ахъада БОТАШЕВ Азрет-Али, Красна Восток администрация ахъада ХВЫТI Игорь, Кълыч Рауф йыхьыз зхъу Гвым кыт аквтанай апхьарта арыпхьагIв БЕЖАН Борис, Афганистан аветеранква социальна цхърагIара драдзарала аорганизация апредседатель СОЛНЦЕВ Анатолий датшагьи. Семенов Ахмат Хъакъвпщ Игорь дъанхалакIгьи акъральыгIва уысква гвхътIыла йшйырхъйуз, чкIвыныргIа рпатриот бжьара къару ду шалайцIаз гIаликIгIатI. – УахьчIва Хъакъвпщ Игорь сквшы гIважва руацIа дъанхаз айсра комиссариат апны йчвахъабага гъвы гIахъхIтIырныс хIайззатI. КЧР-ла гIатгара змаз акъральыгIва къвырльыкъвхара анхагIвы, аподполковник Хъакъвпщ Игорь йынцIра зпищылыз айсра ъачIвагIа дазцIабыргта йборч йырхъйатI. Ауи Зеленчук йгьи Уарп муниципальна районква райсра комиссариат унашва ъадзахъицIуз чкIвыныргIа къвырльыкъвхара йазрыхIазырра йахъазымкIва, Абашта айсра Ду аветеранква, айсыгIвчва-интернационалистква дырцхърагIун, ангIалрала акъвырльыкъвхара тшадызкIылуаз ачкIвынчва руыс йрыласуан. Хъакъвпщ Игорь Россия Абджьар Къаруква рпны сквш 40 руацIа йкъвырльыкъвхара борч хъацIарала йырхъйатI. Ауи йагIамкIва абзазара далцIтI, йцрикви йаргванкви ргвакъвпра рыцагIвхIшитI. Хъакъвпщ Игорь хIыгвква пхата дыртазлуштI, – йхIватI Семенов Ахмат. Хъакъвпщ Игорь зтшын дйыз – декабрь а 21 йаквшвауата йчвахъабага гъвы гIахъыртIытI. Ауи сквш 58 йхъыцIуашын, ауаса асквш 2018, апрель а 13 адуней йхIваджьтI. – ХъацIара, гIвычIвгIвысагIара злаз хIыгIвза, хIаща Хъакъвпщ Игорь КIара йпа агIврайонкI райсра комиссариат даунашвачпагIвта дъадзанхаз йъачIвагIа дазцIабыргта йхачIвква гвхътIыла йырхъйатI, дъайыз, дъабзазуз бзи йшибуз апшта, й-Псадгьылгьи дазцIабыргта чкIвыныргIа акъвырльыкъвхара йазрыхIазырра, рпатриот бжьара дырзынхатI. Ауи унашва зхъицIуз агвып, дыздыруаз зымгIва пхата ргвы дгIатахатI. Айсра къвырльыкъвхара апны йгIатгараква уанрыквчважвауа швапхата йгIауырбуш, къральыгIва ртшхъвагата йгIайквнадыргаз щарда йнадзитI, – йхIватI Темыр Арсен. Ауи Хъакъвпщ Игорь йчвахъабага гъвы агIахътIра йацызкIыз хIреспублика аунашвачпагIвчва, Зеленчук, Уарп районква рхъадаква, ауыс абзазара йалазжьыз агвып дшырзыразу йхIватI. – Игорь КIара йпа араъа сквшщарда дшынхаз, агIврайонкI рунашвачпагIвчва хвду йзырбауата, йзыразта йхачIвква шйырхъйуз йагIарбагапI ачвахъабага гъвы. Ари ауыс апны йгIахIыцIагылыз зымгIвагьи АлахI дырзыразхатI, – йхIватI Темыр Арсен. Хъакъвпщ Игорь «Великая сентябрьская революция» Ливия гIарып къраль аорден, «За безупречную службу», «За отличие в воинской службе», «За воинскую доблесть» медальква гIайквнадыргатI. Ауи «Къарча-Черкес Республикала гIатгара зму акъвырльыкъвхара анхагIвы» ЧIахIра хьзы данкъвгагIвын. Россия айсра комиссариатква йырхъыцIыз асквшышв йапылуата йгIайквнадыргаз «За трудовую доблесть» хъахчарала Россия а-Министерства амедаль адуней анихIваджь амщтахь акIвпI йангIарадзах. Темыр Арсен акъральыгIва ртшхъвага ауи йтгIачва йритхтI. Хъакъвпщ Игорь дыздыруаз зымгIвагьи йпсра ргвы йыцIалтI. Красна Восток кыт администрация ахъада ХвытI Игорь Хъакъвпщ Игорь дъайыз, дъапхьаз ашта бзи йшибуз, ауи бзиракI азихарныс дшгвжважвуз гIайгвалашвахтI. – Игорь КIара йпа хIреспублика утыцIтагьи нхарала йыхьыз йыргатI. Дыздыруаз зымгIвагьи пхата ргвы дгIатахатI. Ауии сари бзита хIабадыруан, акыт дызгIамйыргьи телефонла хIайчважвун. Адуней анихIваджьуашыз апхъала акыт аквта парк апны мзагIв цIла лайцIарныс шитахъыз гIасайхIвтI. Ауи хIаналачважва амщтахь цIла шIа йыцгIайгын, йгвы йштаз апшта ауаъа йлахIцIатI. Игорь дгIахIдыргвалашвауата амзагIв цIлаква хIпарк дрыпшдзитI. Ауи дтынчын, гIвычIвгIвысагIара нкъвигун, айчважварала, айкьангьашрала гвтынчра гIауылайцIун. УахьчIва Хъакъвпщ Игорь швабыжта дхIыгхитI. Ауи йшвапхала йгIадзынгылуаш чкIвыныргIа хIщардазтI, – йхIватI ХвытI Игорь. Бежан Борис Гвым кыт абзазагIвчва рыхьызла Хъакъвпщ Игорь йчвахъабага гъвы дызрычпаз, йхъмаштылра йазынархаз айззара адызгалыз дшырзыразу гIаликIгIатI. – Хъакъвпщ Игорь дзыгIзаз, дызбжьаз йаба КIара Халид йпа йгьи йан Дуся Асльанбакь йпхIа хIхъа ду йхIзырбауа гIари гIадзындыргылтI. УахьчIва йыгьхIылахым ауат рпачва Олеги Игорьи. АгIвайщчвагьи офицерын – Олег амилиция дамайорта ажвлара ршварагIварадара сквшщарда дазынхатI, архъв акъвырльыкъвхара аподполковник Игорьгьи йгIалихыз аъачIвагIа дазцIабыргта, чкIвыныргIа рыхъазла дшвапхата йхачIвква ацIыхъвадза йнайырдзатI. Адуней йыквхым раба КIара ауат рыхъазла мшкIы дгьгIампхащатI. АгIвайщчвагьи йъанызлакIгьи йъанхалакIгьи р-Псадгьыл йазцIабыргта, рцри кыт, рткъвым, руагIахъа дрыпшдзауа нхаралагьи бзазаралагьи рыхьыз дыргатI. Ауат ршвапхала йгIадзынгылыз хIычкIвынчвагьи айсра ъачIвагIаква тшырзырбжьан, йапшым архъвква рпны хъацIарала рборч дырхъйитI. УахьчIва йгIахIгвалашвахуа Хъакъвпщ Игорь йан Дуся, йахща Света, йаща Индранил ауи ахIа гвакъвпра думырбахын, рцриква йгIартынхаз асабиква рдахIвраква йрайгвыргъьауа йырбзаза. ХъацIара злаз, чкIвыныргIа акъвырльыкъвхара йыззаквыргвышхвуз, гIвычIвгIвысагIара нкъвызгуз, акъральыгIва ртшхъвагаква зщардаз Игорь КIара йпа зынгьи дгьхIхъаштылуашым, – йхIватI арыпхьагIв Бежан Борис. Айззара апны йгIачважваз Уарп йгьи Зеленчук районква радминистрацияква ргIащтийыгIвчва агIврайонкI рпынгьи къвырльыкъвхара йызшIыртуаз чкIвыныргIа ртгIачваква дъарцхърагIуз, ажвлара, апатриот организацияква аргваныта дъарыцынхуз рыхъазла йшизыразу гIалыркIгIатI. АгIврайонкI рсоветква рщаквыргылрала Хъакъвпщ Игорь Зеленчук йгьи Уарп районква рпны «ЧIахIра зму акъральгIв» хьзы шиквнадыргаз гIархIватI. Хъакъвпщ Игорь йхъмаштылра йазынархаз айззара уагIа щардагIв гIадгылтI. Ауи йцриква, йаргванква йырхъазымкIва, Кисловодск, Ставрополь городква, хIреспублика акыткви агородкви йгIартыцIыз зымгIва пхата дгIаргвалашвахтI. Кисловодск йбзазауа Макъвауа ГIвзер Хъакъвпщ Игорь йыцапхьаз рыхьызла дгIачважватI. Ауи Игорь КIара йпа чкIвыныргIа зздзыргIвуаз, хъацIара злаз офицерта акъвырльыкъвхара дшалаз гIайхIватI, чвахъабага гъвы кIыдцIара збзиру дшырзыразу гIаликIгIатI. Амитинг амщтахь Хъакъвпщ Игорь йаща Индранил, Зеленчук йгьи Уарп районква райсра комиссариат аунашвачпагIв Ефимов Виктор ачвахъабага гъвы гIахъыртIытI, ахъмаштылра йалаз ауагIа ауаъа ахIврапшдзаква щтIарцIатI.