Актуально Росгвардейцы Северо-Кавказского округа участвуют в ведомственном чемпионате по боксу «Кубок Победы» Актуально Тхэквондистка из КЧР завоевала бронзу на Кубке России Актуально В Карачаево-Черкесии подвели итоги регионального этапа Всероссийского конкурса «Лучшая школьная столовая – 2024» Актуально VIII Международный женский конгресс впервые проходит в КЧР Актуально Глава КЧР Рашид Темрезов рассказал о подготовке к празднованию 80-ой годовщины Победы в Великой Отечественной войне

АУАГIАХЪАКВА РАЙГВАРА ЙАЗЫНХИТI

19.04.2019 222
АУАГIАХЪАКВА РАЙГВАРА ЙАЗЫНХИТI
Апрель а 12 КЧР а-Правительства Тдзы апны ауагIахъа уысквала, ажвлара коммуникацияквала йгьи печатьла а-Министерства аколлегия алачIвара акIвшатI. Ауи асквш 2018 агIан а-Министерства йгьи ауи ахъпшылра йацIу анхартаква ргIарбараква йырзынархан. Аколлегия анхара йалан КЧР а-Хъади а-Правительстви р-Администрация аунашвачпагIв йапхъахауа йзаместитель СЕМЕНОВ Ахмат, КЧР Ажвлара палата знапIыцIу МОЛДОВАНОВА Вера, КЧР амсылманква р-Дин УнашвахъцIарта амуфты БЕРДИЕВ Исмаил-хIаджь, аправослав диннкъвгагIв НАРТОВ Александр, ауагIахъа жвлара адкIылараква, ареспублика хабарргагаква рунашвачпагIвчва. АуагIахъа уысквала, ажвлара коммуникацияквала йгьи печатьла КЧР аминистр ХАПИШТОВ Мурат йшгIайхIвазла, асквш 2018 агIан хIреспублика абзазагIвчва злаз жвлара уыста 150 айхIа адыргалтI, ауагIа йгьи ашIаква ртшдырри ргвбайари рыбагъьарала нхара ду акIвдыршатI ажвлара организацияква, ауагIахъа адкIылараква. АуагIахъаква райгвара рыбагъьара йгьи акультура тынхакви ацIаскви рхчара йырзынархан ажвлара адкIыларакви а-Министерстви йакIвдыршаз «Покров» фестиваль, ачеркес бызшва афестиваль, акъарчаква ртурых гIахъызтIуа «Джилтин» форум, абазаква ркультура а-Мш. Хапиштов Мурат йгIачважвара апны чкIвыныргIа рбжьара йазынхауа ауысква рахIа дрыквгIашIастI. – «Диалог и развитие» зхьзу аслет йапшым ауагIахъаква йгIарылцIыз чкIвынчвати хIвсысати 350-гIвы аднакIылтI. АуагIахъаква разазаъаща, йапшым адинква рацынхара, атерроризм йгьи аэкстремизм рабакIра йырзынарху чкIвыныргIа рфорум, «Мир вашему дому» фестиваль, «Роль молодежи в гармонизации межэтнических и межконфессиональных отношений в поликультурной среде» наука айззара астуденткви апхьагIвчви аднакIылтI, ашIаква рдунейпшыща атшауацIыхра йасабапхаз гIаншарахатI, – йхIватI Хапиштов Мурат. – ЦIыпх Грозна йакIвшаз СКФО ахабарргагаква й-VI-хауа рфорум апны хIышта апечать гIацIщтраква асквш ауацIала абзазара йаларжьуаз «Къвнакъра» проект швабыжта йшджьащахъву гIалыркIгIатI, йазалху диплом гIаквнадыргатI. Ари а-Министерства аъачIвагIагIвчва аргваныта адин адкIылараква, ахабзахчара органква йрыцынхитI, атерроризм гIашIакIрала ауысква ацдырхъйитI. АуагIахъа уысквала, ажвлара коммуникацияквала йгьи печатьла КЧР аминистр КЧР Ажвлара палата апредседатель Молдованова Вера, КЧР амсылманква рмуфты Бердиев Исмаил-хIаджь, ауи йзаместитель Катчиев ИбрагимхIаджь, алагъь йгьи гIвадахь православ округква рдиннкъвгагIвчва Нартов Александр йгьи Субтельный Евгений ажвлара атынчра хчара къару ду шаларцIауа гIаликIгIатI. Аминистр атерроризм йгьи аэкстремизм рабакIра йазынарху апрограмма дырхъйауата ашIаква, ауат ран-рабачва буклетта 18-н зыкь шрыларшаз, хIышта йалсуа афедеральна мгIваква рпны абаннерква шкIнырхIаз, аинтернет сайтква рпны ахабза мыгIвхъызгауа агIвыраква аъамызлара йшахъпшылуаз, къральыгIва йгьи муниципальна къвырльыкъвхагIвта 30-гIв рыхъазла йазалху атшыбжьараква шадыргалыз гIайхIватI. АуагIа ргватшныра арыбагъьара йащтата асквш 2018 агIан а-Министерства агIаджвыквцIарала, ажурналистква р-Союз ахъвшара ацкIрала ахабарргагаква руацIала атерроризм йапшIагылуа агIвыракви агIатракви ранкъвакъвра акIвдыршатI. Ауи йгIалалыз ахабарргагаква журналист нхарата 49 гIадыргалтI, апхъагылагIвчва йазалху дипломи ахча согIи рырттI. – Афедеральна йгьи ашIыпIа хабарргагаквагьи ари анархара гватра ду азалырхитI, – йхIватI аминистр. – Асквш 2018 агIан апечать гIацIщтраква гIвырата 300 райхIа гIарыншвалтI, ашIыпIа телебарала атерроризм йапшIагылуа гIатрата йгIадырбаз 100 йайхIапI. Хапиштов Мурат хIреспублика ауагIахъаква райгвара рыбагъьара йазынхауа «День республики», «Абазашта», «Къарачай», «Черкес хэку», «Ногай давысы» газетква рредакцияква, акнига гIацIщтырта, асаби журналква, «Къарча-Черкес» ГТРК, «Архыз-24» телеканал рынхагIвчва аразыра ажваква рзынайырхатI. – ЦIыпх агIан ауагIахъаква йгьи йапшым адин адкIылараква ракъыльаквшвара йазынархата ашIыпIа газетква гIвырата 732 гIарыншвалтI, зылшараква ахъарысу рбзазаща агъьчIвра йазынарху «Доступная среда» проект абзазара йшаларжьуа гIахъызтIуа гIвырата – 175, апатриот бжьарала – 890, аркъажвра, атутынчвара, анаркомания рабакIрала – 320, амгIва шварагIварадарала – 259, ацифра телебара ашIарышврала гIвырата 136 гIарыншвалтI. Аминистр йапхъахауа йзаместитель Хвби Ислам а-Министерства агIаджвыквцIарала йакIвдыршаз асоциология рхъвыхраква ргIарбараква аколлегия йалу ахайыргIвазатI. АзцIгIараква сквш 14–60 йырту КЧР йабзазагIвчвата 1273-гIв гIаланадыркIтI. – Ауат йрыуата процент 62 рбзазаща йарыразитI, йапшым апшIагылра айззараква йрылалырныс тшгьадыргалуам. Архъвыхраква йгIаланадыркIыз рпроцент 60 хIышта апны социальна аквыргъвгъвара аъамкIва йырпхьадзитI. Арат агIарбараква хIышта апны аъаща штынчу гIадырцIабыргитI, ауи ажвлара, ауагIахъа, адин адкIылараква, ашIыпIа хабарргагаква рынхаща гIахънатIитI, – йхIватI Хвби Ислам. АлачIвара апны асквш 2019 агIан йыздынхалуаш ауыс хъадаква щаквдыргылтI. ХIызту асквш агIан ареспублика книга гIацIщтырта апны зынхараква гIацIцIуаш щаквдыргылра ахъазла ашвъаква йрылапштI. КЧР а-Хъади а-Правительстви р-Администрация аунашвачпагIв йапхъахауа йзаместитель Семенов Ахмат, КЧР Ажвлара палата апредседатель Молдованова Вера, адиннкъвгагIвчва Бердиев Исмаил-хIаджь, Нартов Александр, «Русь» жвлара организация знапIыцIу Жедяев Евгений, «Абаза» жвлара организация апредседатель Дзыуа Зауыр, «Адыге хасэ» жвлара мгIвайсра аунашвачпагIв йзаместитель Афаунов Исмаил, «Ногай Эл» уагIахъа-культура автономия знапIыцIу Казаков Валерий хIышта атынчра хчарала, ауагIа х ъа азазаъащ аква рагъьчIврала, ашIыпIа хабарргагаква цхърагIара драдзарала ражванахъаква гIархIватI, цIыпх а-Министерства шынхаз уарыразуата йырпхьадзатI
222 просмотров


Комментарии

Написать
Комментарии >



Подписывайтесь на RIAKCHR в Одноклассниках Получайте свежие статьи и новые публикации на свой мобильный
Вступайте в сообщество RIAKCHR в “ВКонтакте” Получайте свежие статьи и новые публикации на свой мобильный
Вступайте в сообщество RIAKCHR в “Telegram” Получайте свежие статьи и новые публикации на свой мобильный