РЪАЧIВАГIА ЙАХАДЫРГIВАЗАТI

«РусГидро» КЧР-ла ахъвшара анхагIвчва Сарытюз квтанай апхьарта апхьагIвчва рыхъазла экскурсия акIвдыршатI. Ауат Зеленчук гидроэлектростанция анхара шакIвшауа йахадыргIвазауата пщгидроагрегаткI ъагIвнагылу амашинна зал йнардылтI. АшIаква аъачIвагIагIвчва анхагакI шдырчIаджьуаз, ауи атшын йынхуз агвып агидроэлектростанция анхара адгалрала ахачIвква шдырхъйуз рбатI. Асасчва аэнергетикква рынхара рымаджьащахъвата щарда йазцIгIатI. Анхара хчарала йгьи архарджьра ахъпшылрала акъвырльыкъвхара аунашвачпагIв Брацыхин Геннадий агидроэлектростанцияква рпны ъачIвагIагIвта йыззыбжу, ауи уъапхьуш, аъачIвагIа гIацIгарта уыцIалра ахъазла дыррата йатахъу йахайыргIвазатI, ауи йахъазымкIва аэлектричества айгьдзара йгьи ашварагIварадара уысквагьи йрыквчважватI. АпхьагIвчва ркласс унашвачпагIв Биджиева ФатIима йшгIалылкIгIазла, аэкскурсия джьащахъван, сабапрагьи алан. Йауа ухIварыквын, аэнергетикква шынхауа ашIаква рылала йырбатI, ауат ръачIвагIа гIалызхырныс мурадта йызму кьангьаш гьрылахым.