«РОСГВАРДИЯ. АЬР ДАЙЫМ ДА КАРАВЫЛДА!»

Кайсы кеспи энъ маьнели, деген соравга аьдемлер туьрлише яваплайдылар. А эгер энъ эркли, авыр эм тынышсыз кеспи кайсыды деп сорасанъ, менимше, олар эр кисилердинъ авыр кеспилери акында эслерине туьсирип, от соьндируьвшидинъ, куткарувшыдынъ, аьскершидинъ ислерин белгилееклер. Энъ билимлилер деп аьлимлерге, акыл аьрекетлиги мен каьрлейтаганларга айтаяклар. Ама, менимше, йогарда айтылган баьри анъламларды бириктиретаган кеспи бар. Онынъ иелерининъ иси - энъ керекли, авыр эм яваплы. Ол, сондай болып, дайым билиминъди эм сулыбынъды оьстирип турувды талаплайды. Сол аьдемлер алдында айлак маьнели эсаплар турадылар - гражданлардынъ кавыфсызлыгын кыянатшылардынъ ш апкынлык этуьвиннен коршалав, терроршылыкка карсы шыгув, экстремистлик ойларды, миллетлер эм динлер ара душпанлыкты тутандырувдынъ йолларын бувув, уйгынланган кыянатшылык пан эм карыжланув ман куьрес бардырув. Сол аьдемлер - Росгвардиядынъ куллыкшылары. К о ь п а ь д е м л е р д е Росгвардияда куллык этетаган таныслары эм ювыклары бар. Менде де оьз халкына, кыралына алал кызмет кылатаган, олар алдында оьз борышларын сахый толтыратаган кардашларым коьп. Эм мен олар ман оьктемсиймен. 21 оьмирдинъ коьплеген яс аьдемлери шынты баьтирлерге - Росгвардиядынъ аьскершилерине усагылары келедилер. Неге десенъиз шынты эр аьдемнинъ бас борышы - кыралынъды, оьз тувган юртынъды, онынъ аьр бир терегин, булагын, онынъ таза коьгин, кардаш-кавымынъды коршалав. Олардынъ баьтирлик ислерине багысланып, коьплеген китаплар язылганлар, фильмлер согылганлар, спектакльлер салынганлар. Аьдемлер кыралымыздынъ баьтирлик аьвелгиси акында билмеге эм эслеринде тутпага кереклер. Тек эне сол заманда тийисли келеектегиди курмага амал болаяк. Меним агам Ахмед бала шагыннан алып тек полициядынъ куллыгы ман байланыслы ойыншыклар ман ойнайтаган эди. Ол аьр дайым да кимди де болсын куткаратаган, ярдам этетаган эди. Заман озганнан сонъ, ол бокс пан каьрлеп баслады. Туьрли оьлшемли сынасларда баргылы орынларга шыкты, ийги тамамларга етисти. Бир неше кере КЧР-дынъ бокс бойынша чемпионы, спорт устасына кандидат болды. Биз отставкадагы полковник нагашакам Володяды Аталыкты коршалавшыдынъ куьни мен кезуьвли кере кутламага барганда, Ахмед онынъ янына келди де, булай сорады: «Мен аьскершилик институтына окымага туьским келеди, сол зат акында не зат ойланасынъ?» Нагашакамыз куьлемсирей берип: «Сен туьспеге болаяксынъ, сен сол куллыкты бажараяксынъ!» - деди. Сол куьннен алып бу сорав бизим аьелимизде бир детергелмеди. Неге десенъиз кардашым кайсы кеспиди сайлаягы акында билетаган эди. 9-ншы класста окыйтаган заманда, Ахмед кайсы институтка окымага туьсеегин сайлады. Аьлиги заманда ол Санкт-Петербургта орынласкан аьскершилик институтта 4-нши курста окыйды эм сайлаган кесписи энъ маьнели, яваплы, аьле кавыфлы кеспилердинъ бириси экенин ийги биледи. « Р о с г в а р д и я д ы н ъ аьскершиси куватлы, шыдамлы болмага тийисли. Оннан баска бу кеспиди сайлаган аьдем соьзине берк, яныплы, ярдам этпеге, оьзининъ савлыгынынъ баасы ман да болса, аьдемлерди коршаламага аьзир болып турмага керек. Яваплы болув, авыр аьлде тынышлы болып калув да ийги аьскерши болмага эм кеспиде етимис таппага ярдам этееклер», - дейди кардашым. Аьр куьн сайын, йылдынъ кайсы шагы экенине де карамай, ава кайдай экенине де эс этпей, бу кеспидинъ элшилери аьдемлердинъ тынышлыгын коршалайдылар. М еним ш е, Р о с гв а р ­ диядынъ аьскершилери аьр куьн сайын баьтирлик ислер этедилер. Неге десенъиз олар окында аьле оьз яшавларын аямай, аьдемлердинъ яшавларын куткарадылар. Сол тувылма шынты уллы йигитлик?