ЙАГЪЬУ ХЧАГІВЫТА ТШГІАДЫРБАТІ

Абаза районла асаби ршІыйара Квта арыпхьагІв ДЖЬДЖЬУ Амир унашва зхъицІауа арайон команда апрель а 10 агІан «АдзыгІвбжьа ЙачІва» тшпсщарта парк йакІвшаз «Школа безопасности» анкъвакъвра йалан. Россия МЧС КЧР-ла а-УнашвахъцІарта ацхърагІарала «Центр дополнительного образования» республика нхарта ансисквша йакІвнаршалауа ауи анкъвакъвра амагІны дупІ: ашІаква агвжважвагІва аъащаква рагІан лахъвгІахъасрала йырчпуш рдыруа йазнабжьитІ, йызгІваду бзазара гІалырхуа, чхІара рылата йачпитІ, чкІвыныргІа анбжьагІвыгІара гІарбжьанацІитІ. ХІызту асквш анкъвакъвра 12 командакІ алан. Абаза район акоманда рахІа йбаргвыз «комбинированная эстафета» апны йапхъагылагІвхатІ. «Полоса препятствий» йгьи «Спасательные работы на акватории» квпшыраквала йгІвбахауа агыларта ркІытІ. Анкъвакъвра ацІыхъвагІарбараквала Абаза район акоманда йапхъахауа агыларта гIатыргатI. Ужвы ауат ркъаруква СКФО ауацІала йгІадырбуштІ.